भिजिट भिसामा कुवेत लगेर मानव बेचबिखन गरेको आरोपमा प्रहरीले एक जनालाई नियन्त्रणमा लिएको छ।

पीडितको उजुरीको आधारमा मानव बेचबिखन अनुसन्धान ब्युरो बबरमहलबाट खटिएको प्रहरीले सिन्धुपाल्चोक जुगल गाउँपालिका ३ का ३२ वर्षीय ङेमा लामालाई काठमाडौंको गोकर्णेश्‍वर नगरपालिकाबाट पक्राउ गरेको हो।

लामाले पीडितबाट ९५ हजार रुपैयाँ लिएर २०८० सालको कात्तिक ५ गते भिजिट भिसामा कुवेत पुर्‍याएका थिए। कुवेतमा रहेकी लामाकी श्रीमतीले पीडितलाई रिसिभ गरेर कुवेती नागरिकको घरमा १ हजार १५० कुवेती दिनारमा बेचबिखन गरेको दाबी प्रहरीको छ।

लामाले त्रिभुवन अन्तर्राष्ट्रिय विमानस्थल र कुवेतको एयरपोर्टमा देखाउने कागजातसमेत झुट्टा र फरक फरक रहेको प्रहरीको भनाइ छ।

प्रारम्भिक अनुसन्धानमा कुवेती नागरिकले पीडितलाई बन्धक बनाएको, पारिश्रमिक नदिई घरेलु कामदार राखेको र यौन तथा चरम श्रम शोषण गरेको पाइएको प्रहरीले बताएको छ।

पक्राउ परेका लामाविरुद्ध मानव बेचबिखन तथा ओसारपसार मुद्दामा जिल्ला अदालत काठमाडौंबाट ५ दिन म्याद थप अनुमति लिई प्रहरीले अनुसन्धान गरिरहेको छ।

Published on: 16 July 2024 | Nagarik